Bakı Ali Neft Məktəbində (BANM) proseslərin avtomatlaşdırılması mühəndisliyi ixtisası üzrə təhsil alan tələbələr arasında robototexnika üzrə yarışma keçirilib.

BANM-in mətbuat xidmətindən   bildiriblər ki, bu ali məktəbin rektoru Elmar Qasımov tələbələrin yaradıcılıq və təşəbbüslərinin, onların qatıldıqları yarış və sərgilərin əhəmiyyətini diqqətə çatdırıb. Qeyd olunub ki, belə yarışlarda BANM-in əməkdaşlıq etdiyi beynəlxalq şirkətlərin təmsilçilərinin iştirakı da təqdirəlayiqdir. Rektor yarışmanın qaliblərini mükafatlandıran Avandsis GROUP, Schneider Electric, Emerson Process Management, ABB, Siemens şirkətlərinə təşəkkür edib, bu qurumlarla əməkdaşlıqdan məmnunluğunu bildirib. E.Qasımov bilik yarışmasının davam etdirilməsinin, gələcəkdə orta ümumtəhsil məktəbləri ilə birgə keçirilməsinin vacibliyini vurğulayıb, yarış iştirakçılarına uğurlar arzulayıb.

Sonra üçüncü kursda təhsil alan 18 tələbədən ibarət altı komandanın iştirakı ilə yarışma başlanıb. Tələbələr hazırladıqları və proqramlaşdırdıqları robotları nümayiş etdirib, onların işləməsini əyani göstəriblər.

Yarışın nəticələrinə əsasən, “New era” komandası birinci, “Moon walkers” komandası ikinci, “Star” komandası üçüncü yerləri tutublar.

Qalib komandalara BANM-in əməkdaşlıq etdiyi şirkətlər tərəfindən hədiyyələr verilib.

Vaqif BAYRAMOV,
“Xalq qəzeti”