Azərbaycan Respublikasının Prezidenti yanında Dövlət İdarəçilik Akademiyasında (DİA) dövlət və bələdiyyə idarəetməsi ixtisası üzrə intensiv əlavə ixtisas proqramı ilə üçillik qiyabi təhsil almaq üçün Azərbaycan Respublikası Prezidentinin Administrasiyası tərəfindən seçilən yüksək vəzifəli dövlət qulluqçuları ilə görüş keçirilmişdir.
Tədbirdə çıxış edən DİA-nın birinci prorektoru, professor Əlikram Abdullayev ümummilli lider, müstəqil dövlətimizin memarı və qurucusu Heydər Əliyevin elmin, təhsilin inkişafına daim böyük önəm verdiyini, ulu öndərin siyasətinin Azərbaycan Prezidenti İlham Əliyev tərəfindən uğurla davam etdirildiyini vurğulamış, dövlətimizin başçısı İlham Əliyevin təhsilə göstərdiyi diqqət və qayğıdan danışmışdır.
DİA-nın respublikamız üçün idarəçilik sahəsində peşəkar kadrların hazırlanması istiqamətində önəmli rolunu qeyd edən Ə. Abdullayev bu ali məktəbdə təhsilin inkişafı üçün həyata keçirilən tədbirləri, qazanılan nailiyyətləri xatırlatmış, müdavimlərə uğurlar arzulamışdır.
Akademiyada təşkil olunan sərgidə müdavimlər Prezident Administrasiyasının rəhbəri, akademik Ramiz Mehdiyevin müxtəlif illərdə yazdığı əsərlərlə tanış olmuşlar.
AzərTAc{nl}