{nl}

 İyulun 12-də Fransa Dövlət Şərq Dilləri və Mədəniyyətləri İnstitutunun (İNALCO) rektoru, professor Jak Löqran Bakı Dövlət Universitetində (BDU) olmuşdur.
Bakı Dövlət Universitetindən bildirmişlər ki, görüşdə BDU-nun rektoru, Milli Məclisin deputatı, akademik Abel Məhərrəmov rəhbərlik etdiyi ali məktəbin fəaliyyətindən, onun beynəlxalq əlaqələrindən danışmışdır.
Şərq Dilləri və Mədəniyyətləri İnstitutu barədə ətraflı məlumat verən Jak Löqran qeyd etmişdir ki, institutda 96 dil, o cümlədən 1999-cu ildən Azərbaycan dili tədris olunur. 2008-ci ilin noyabrında isə Azərbaycan dili fakültəsi açılmışdır. Qonaq, eyni zamanda, BDU ilə əməkdaşlığın əhəmiyyətini vurğulamışdır.
Akademik Abel Məhərrəmov BDU-da fransız dili və ədəbiyyatının tədris olunduğunu xatırlatmışdır.
Görüşdə qərara alınmışdır ki, Şərq Dilləri və Mədəniyyətləri İnstitutunda Azərbaycan dilinin, BDU-da isə fransız dili və ədəbiyyatının daha səmərəli tədrisi üçün mütəxəssis mübadiləsi aparılsın.