Prezident İlham Əliyev tərəfindən Azərbaycanda elan olunmuş "Ekologiya ili" çərçivəsində ölkəmizin ABŞ-dakı səfirliyi qabaqcıl Merilend Universitetində "Azərbaycan: Ən cəlbedici faktlar və nailiyyətlər" adlı inşa müsabiqəsi keçirmişdir.
Səfirlikdən bildirmişlər ki, müsabiqənin məqsədi amerikalı tələbələri Azərbaycanın zəngin təbiəti, ətraf mühiti, ekologiyası, həmçinin tarixi, iqtisadiyyatı, mədəniyyəti, adət-ənənələri ilə bağlı araşdırmalara sövq etməkdir.
Bir çox tədqiqat işlərinin qiymətləndirilməsindən sonra səfirliyin müsabiqə şurası Merilend Universitetinin iki tələbəsini - Çinçu Harrisi və Hafi Yillahı müsabiqənin qalibləri elan etmişdir. Qaliblər Azərbaycana səfər edəcəklər.
Merilend Universitetinin professor-müəllim heyətinin və tələbələrinin iştirakı ilə təşkil olunmuş təntənəli tədbirdə Azərbaycanın ABŞ-dakı səfirliyi tərəfindən qaliblərə müvafiq şəhadətnamələr təqdim edilmişdir.
Qaliblər Merilend Universiteti və Azərbaycanın Xəzər Universitetinin birgə təşkilatçılığı ilə mayın 21-dən iyunun 4-dək Bakıda keçiriləcək ətraf mühit məsələlərinə dair tədris kurslarında iştirak edəcəklər.
Azərbaycana səfər çərçivəsində onlar ətraf mühit, ölkəmizdə həyata keçirilən ekoloji layihələr və bu sahədə nəzərdə tutulan planlarla tanış olacaqlar.
AzərTAc