Təhsil Nazirliyi tərəfindən hazırlanmış elektron dərslik portalında (www.e-derslik.edu.az) yerləşdirilən elektron kitabların sayı 209-a çatdırılıb. 2018-ci ilin ilk  aylarında portala X sinif üzrə 10 yeni elektron dərslik əlavə edilib. Bundan başqa, 15 elektron dərslik multimedia vəsaitləri ilə zənginləşdirilib. Həmin dərsliklərdə mövzulara uyğun video, qrafika, səs və digər multimedia vasitələri ilə şagirdlər biliklərini daha da artıra bilərlər.

Elektron dərslik portalından indiyədək 2 915 000 dəfədən çox istifadə olunub. Portaldan qeydiyyatdan keçən istifadəçilərin sayı hazırda 178 019 nəfərdir. Cari ildə portalın ümumi dizaynı tamamilə yenilənib və yeni funksiyalar əlavə olunub. Son dəyişikliklərdən sonra qeydiyyatdan keçmədən də portala daxil olub elektron kitablardan istifadə etmək mümkündür. Bundan əlavə, bütün dərsliklər üzrə sürətli axtarış sistemi aktivləşdirilib.

2014-cü ildən fəaliyyət göstərən www.e-derslik.edu.az portalının hazırlanmasında məqsəd təhsilalanları təhsil prosesində fəallaşdırmaq və onların İKT-dən səmərəli istifadə etməsinə, dərslikləri elektron formatda oxumasına imkan yaratmaqdır. İstifadəçilər portalda olan metodiki vəsaitləri seçmək üçün əlavə olunmuş filtrdən istifadə edə bilərlər.

Əlipənah BAYRAMOV,
“Xalq qəzeti”