AMEA-nın Mikrobiologiya İnstitutunun Mikroorqanizm kulturalarının kolleksiyası labrotoriyasının müdiri, biologiya üzrə fəlsəfə doktoru, dosent Yamən Atakişiyevanın layihəsi II Azərbaycan-Belarus beynəlxalq qrant müsabiqəsinin qalibi olub. Müsabiqəni Azərbaycan Respublikasının Prezidenti yanında Elmin İnkişafı Fondu ilə Belarus Fundamental Tədqiqatlar Fondu təşkil edib.

www.science.gov.az saytı yazır ki, “Tərəvəz bitkilərinin kök sisteminə yoluxmuş fitopatogenlərə qarşı bacillus və trichoderma cinslərindən olan mikroorqanizmlərin antaqonist təsirinin sinergetik potensialı” adlı layihənin icrasına artıq başlanılıb. Layihənin əsas məqsədi tərəvəz bitkilərinin yetişdirilməsi zamanı kökdə yayılmış fitopatogen mikroorqanizmlərin nəzarəti üçün yüksək fəallığa malik trichoderma cinsindən olan saprotrof mikroskopik göbələk və bacillus cinsindən olan bakteriya ştamlarından birgə istifadənin potensial imkanını öyrənməkdir.

                                                                                     Əlipənah BAYRAMOV,
“Xalq qəzeti”