Dövlət Neft Şirkətinin yaydığı məlumatda bildirilir ki, adı çəkilən müəssisədə nümayiş və sınaq məqsədilə ilk dəfə polipropilen məhsulunun istehsalı həyata keçirilib.

Zavod polipropilen və yüksəksıxlıqlı polietilen istehsal edən iki müəssisədən ibarətdir. Zavodların istismara verilməsi cari ilin ikinci və dördüncü rüblərində nəzərdə tutulur.

Müəssisələrin işçi heyəti artıq tam formalaşıb, müvafiq təlimlərdən keçərək yüksək peşəkarlıq səviyyəsinə çatdırılıb.

Sənaye səmərəliliyinin artırılması məqsədilə “SOCAR Polymer” zavodlarının rəqəmsallaşması “SAP” (Sistem Analizi və Proqramlaşdırma) modullarının vasitəsi ilə təmin olunacaq.

Vaqif BAYRAMOV,
“Xalq qəzeti”