Bakı Ali Neft Məktəbində (BANM)  Xocalı soyqırımına həsr olunmuş tədbir keçirilib. Əvvəlcə tədbir iştirakçıları Xocalı soyqırımı qurbanlarının əziz xatirəsini bir dəqiqəlik sükutla yad ediblər.

Daha sonra ali məktəbin rektoru Elmar Qasımov çıxış edərək  Xocalı soyqırımını Azərbaycan xalqının yaddaşından heç vaxt silinməyəcək dəhşətli cinayət adlandırıb. Rektor bildirib ki,   bu hadisə təcavüzkar ermənilər tərəfindən Azərbaycan xalqı üçün təşkil edilən yeganə soyqırım olmayıb, ondan əvvəl də xalqın başına dəfələrlə oxşar müsibətlər gətirilib.

E.Qasımov ölkə başçısı cənab İlham Əliyevin uzaqgörən siyasəti və Azərbaycan xalqının güclü iradəsi nəticəsində bu gün Xocalı soyqırımının dünya ictimaiyyətinə tanıdılması uğrunda böyük addımlar atıldığını bildirib və bütün iştirakçıları, eləcə də gəncləri bu soyqırımın dünyaya çatdırılmasında dövlətimizə dəstək olmağa çağırıb.

Ali məktəbin dosenti, tarix üzrə fəlsəfə doktoru Ələmdar Şahverdiyev Xocalı soyqırımının bütün təfərrüatları ilə bağlı tədbir iştirakçılarına məlumat verib.

Ali məktəbin rəhbərliyi, professor-müəllim heyəti, tələbələri Xocalı prospektində Xocalı soyqırımının qurbanlarının xatirəsinə ucaldılmış  “Ana fəryadı” abidəsini də ziyarət ediblər.

Vaqif BAYRAMOV,
“Xalq qəzeti”