Ölkəmizin istehsal potensialının artırılması məqsədilə dövlət əmlakının özəlləşdirilməsi, müəssisələrin fəaliyyətinin genişləndirilməsi istiqamətində müasir yanaşmalara əsaslanan yeniliklər tətbiq edilir. İqtisadiyyatda özəl sahənin xüsusi çəkisinin artırılması üçün investiya mühiti daha da sağlamlaşdırılır, yerli və xarici investorlar özəlləşməyə cəlb edilir. Özəlləşdirmə prosesində maksimum operativliyi təmin edən açıq və şəffaf hərraclar da investor kütləsini bu prosesə cəlb etmək üçün unikal vasitədir. Bu hərraclarda iştirak edən hər bir sərmayəçi biznes layihələrinə uyğun olaraq özəlləşdirilməyə çıxarılan müxtəlif çeşidli əmlak üzrə seçim imkanı qazanır.

Əmlak Məsələləri Dövlət Komitəsi tərəfindən növbəti belə hərrac 20 fevral tarixində keçirilib. Bu dəfəki hərracda özəlləşdirilən əmlaklardan 1-i səhmdar cəmiyyəti, 2-si kiçik dövlət müəssisəsi, 3-ü isə qeyri-yaşayış sahəsi olub. Hərracda özəlləşdirilən kiçik dövlət müəssisələri paytaxtın Sabunçu və Mərdəkan ərazilərində yerləşir. Həmin əmlaklar  sahibinə yaxşı gəlir gətirə bilər. Belə ki, ümumi sahəsi 45,6 kvadratmetr olan və Sabunçu rayonunda yerləşən 49 saylı,  Mərdakandakı 96 saylı mağazalar  ərzaq mallarının pərakəndə satışı üçün olduqca münasibdir.

Hərracların keçirilməsinin bir sıra iqtisadi üstünlükləri var. Təcrübə göstərir ki, özəlləşən müəssisələrə yüksək standartlara uyğun avadanlıq gətirməklə fəaliyyəti yenidən bərpa olunur. Həmin müəssisələr yeni iş yerlərinin açılmasına, müasir xidmətlərin göstərilməsinə, rəqabət qabiliyyətli məhsul istehsalına şərait yaradır. Həmçinin bölgələrin iqtisadi potensialının artmasına, dövlət və vətəndaş mənafelərinin təmin edilməsinə də müsbət təsirini göstərir.    

Bölgələrdə özəlləşdirilən müəssisələrin yenidən fəaliyyəti regionların sosial-iqtisadi inkişafını daha da sürətləndirir. Regionlarda yeni iş yeri açılmaqla insanların yaşayış səviyyəsində müsbət dəyişiklik baş verir. 

Qeyd edilməlidir ki, Əmlak Məsələləri Dövlət Komitəsi tərəfindən növbəti hərrac fevralın 27-də keçiriləcək. Hərraca investorları cəlb edə biləcək çoxçeşidli əmlaklar çıxarılıb. Özəlləşməyə çıxarılan 74 əmlakdan 23-ü səhmdar cəmiyyəti, 21-i kiçik dövlət müəssisəsi, 25-i istifadəsiz qeyri-yaşayış sahəsi, 5-i isə nəqliyyat vasitəsidir.  

Əlipənah BAYRAMOV,

“Xalq qəzeti”