Xəzər dənizinin Azərbaycan sektorunda yerləşən “Şahdəniz-2” qaz-kondensat yatağından hasil olunacaq təbii qazı Avropaya nəql edəcək Trans-Adriatik qaz boru kəmərinin (TAP) tikintisi davam etdirilir.

“APA-Economics” TAP konsorsiumunun yaydığı məlumata istinadən xəbər verir ki, ümumi uzunluğu 878 kilometr olan boru kəmərinin Yunanıstan və Albaniyadan keçən 765 kilometr hissəsinin 458 kilometri və ya 60 faizinin tikintisi artıq yekunlaşıb.

Qeyd edək ki, TAP layihəsi Avropa Birliyinin enerji təhlükəsizliyi və enerji mənbələrinin diversifikasiyasına görə strateji məqsədlərində mühüm rol oynayır. Təbii qazın Azərbaycandan Avropa bazarlarına ixracının ən qısa və birbaşa marşrutunu TAP təşkil edir. TAP layihəsi üzrə Albaniya, İtaliya və Yunanıstan arasında “Hökumətlərarası Saziş” 2013-cü ilin fevral ayında imzalanıb. Kəmərin fəaliyyətə başlama tarixi kimi 2020-ci ilin yanvar ayı göstərilir.

TAP-ın ilkin illik daşıma qabiliyyəti 10 milyard kubmetrdir (illik 20 milyard kubmetrədək artırıla bilər).

Layihə üzrə hazırkı pay bölgüsü: “Cənub” qaz dəhlizi  QSC - 20 faiz , BP - 20 faiz , “Snam” - 20 faiz , “Fluxys” - 19 faiz , “Enagás” - 16 faiz , “Axpo” - 5 faiz