Novruz bayramı ərəfəsində, martın 19-da Azərbaycan Respublikası Dövlət Neft Şirkətinin prezidenti Rövnəq Abdullayev və şirkətin rəhbər işçilərinin  iştirakı ilə “Neftqaztikinti” Trestinin yeni inzibati binasının təntənəli açılış mərasimi keçirilib.

Tədbir iştirakçılarını salamlayan ARDNŞ-in prezidenti Rövnəq Abdullayev Novruz bayramı münasibətilə bütün neftçiləri, o cümlədən trestin kollektivini təbrik edib. Rəmzi qırmızı lenti kəsən R. Abdullayev və onu müşayiət edən şəxslər binaya baxış keçirib, yaradılmış şəraitlə tanış olublar. ARDNŞ prezidentinə məlumat verilib ki, Bakı Dövlət Layihə İnstitutu tərəfindən layihələndirilmiş bina Bakının Xətai rayonu, Zığ yolu üzərində tikilmişdir. Binanın inşasına ötən ilin yanvar ayından başlanılmışdır.

“Neftqaztikinti” Trestinin 5 saylı Tikinti-Quraşdırma İdarəsi tərəfindən inşa olunmuş yeni inzibati bina pilləvari olmaqla, 3, 5 və 7 mərtəbədən ibarətdir. İnzibati binada hər cür avadanlıqlarla təchiz olunmuş 90 iş otağı, 240 nəfərlik böyük və 30 nəfərlik kiçik konfrans zalları, yeməkxana, eləcə də 100 avtomobillik yeraltı dayanacaq mövcuddur. Bundan əlavə, binanın ərazisində iki ədəd yeni 1000 kVt-luq yarımstansiya, qazanxana və hər biri 150 kubmetrlik iki ədəd su çəni inşa edilmişdir. Yeni inzibati bina avtomatik yanğınsöndürmə sistemi ilə də təchiz olunmuşdur. 8247 kvadratmetrə yaxın sahəsi olan inzibati binanın ətrafı abadlaşdırılmış, asfalt örtüyü salınmış, yaşıllıq zolaqları yaradılmışdır.

ARDNŞ prezidenti Rövnəq Abdullayev yeni inzibati binada yaradılmış şəraitdən, görülmüş işlərdən razı qaldığını söyləyib. Şirkət rəhbəri yeni binanın açılışı münasibəti ilə kollektivi təbrik edib, onlara gələcək fəaliyyətlərində uğurlar arzulayıb. O, həmçinin neftçilərin əmək şəraitinin yaxşılaşdırılması istiqamətində həyata keçirilən tədbirlərin bundan sonra da davam etdiriləcəyini diqqətə çatdırıb.

Mirbağır YAQUBZADƏ,

“Xalq qəzeti”