Azərbaycanda informasiya-kommunikasiya texnologiyaları (İKT) sahəsində həyata keçirilən layihələr Qafqazda telekommunikasiyanın keyfiyyətinin yaxşılaşmasına xidmət edir. Bu barədə Avropa Yenidənqurma və İnkişaf Bankının (AYİB) keçid prosesi haqqında hesabatında (Transition Report 2014) deyilir. 

Nazirlikdən aldığımız məlumatda deyilir ki, hesabata əsasən, Azərbaycanda 2010-cu ilədək əsasən infrastrukturun yaxşılaşdırılmasına diqqət ayrılmış, nəticədə kommunikasiya şəbəkələri tam rəqəmli formata keçirilmiş və xarici internet kanallarının buraxılış qabiliyyəti artırılmışdır.

Telekommunikasiya bazarının liberallaşdırılması özəl sektor üçün imkanlar açmış, bu da öz növbəsində, internetə limitsiz genişzolaqlı çıxış tariflərini azaltmışdır.

 Sənəddə bildirilir ki, Azərbaycanda son illər İKT sahəsində bir sıra təşəbbüslər həyata keçirilmişdir: “2011-ci ildə 40 dövlət qurumunun xidmətlərinin təqdim edildiyi (2013-cü il üçün olan vəziyyətə görə) “Elektron hökumət” portalı işə salınmışdır. 2009-2011-ci illərdə İKT sektoruna yatırılmış dövlət və özəl investisiyaların həcmi iki dəfədən çox artırılmışdır".

 Hesabatda daha sonra qeyd olunur ki, bu ilin iyul ayında İnformasiya Texnologiyalarının İnkişafı Dövlət Fondu yüksək texnologiyalar, elektron ödəniş proqramları, aeronaviqasiya sistemləri və “e-hökumət” sahələrini əhatə edən 31 “startup”a qrantlar təqdim etmişdir: “2013-cü ildə Azərbaycanda İnformasiya Texnologiyaları Universiteti yaradılmış, eləcə də Azərbaycanın ilk “Azerspace-1” telekommunikasiya peyki orbitə buraxılmışdır.

Bütün bunlar Qafqazda telekommunikasiyanın keyfiyyətinin yaxşılaşmasına və Azərbaycanın kosmik sənayesinin inkişafına xidmət edir. Son 10 ildə Azərbaycanda İKT sektorunun illik inkişaf tempi 25-30 faiz olmuşdur. Bu sahəyə neft sənayesindən sonra ən çox xarici investisiya yatırılır", – deyə hesabatda vurğulanır. 

Samirə ƏLİYEVA,

“Xalq qəzeti”