Rabitə və Yüksək Texnologiyalar Nazirliyinin (RYTN) Məlumat Hesablama Mərkəzi (MHM) “Elektron hökumət” portalına daxilolmaların növbəti statistikasını təqdim etmişdir. Statistik uçotun aparıldığı tarixdən - 2012-ci ilin dekabrından 2014-cü ilin oktyabr ayının 31-nə qədər portala daxil olanlar haqda toplanan məlumatlar göstərir ki, portala ümumilikdə 2 959 944 daxilolma qeydə alınmışdır.

Məlumat Hesablama Mərkəzinin yaydığı məlumatda bildirilir ki, portala müraciət edənlərin ümumi sayı isə 1 003 372 nəfər olmuşdur. Belə ki, 1 016 811 nəfər ümumən 2 959 944 dəfə portala daxil olmuş və 5 597 818 elektron xidmətə müraciət etmişlər. Həmin şəxslər  10 441 045 dəfə müxtəlif səhifələrə keçid etmişlər. Onların portala sərf etdikləri vaxt ortalama 6 dəqiqə 29 saniyə olmuşdur.

Vətəndaşların portala marağının artması müşahidə olunmaqla yanaşı, təkrarən portala müraciət edənlərin də kütlə nisbəti artmaqdadır. Bu dövr ərzində portala müraciət edənlərin 35,4%-ni yeni istifadəçilər, 64,6%-ni isə təkrar müraciət edənlər təşkil etmişdir.

Qeyd edək ki, portala daxil olmaq üçün sadələşdirilmiş kod-parol alan istifadəçilərin sayı hazırda 130 142-yə çatmışdır. Azərbaycan Respublikasında yaşayan və şəxsiyyət vəsiqəsinə sahib olan istənilən vətəndaş kod-parol əldə edə bilər. Portal üzərindən təqdim edilən xidmətlərin sayı 382 ədəd olmuşdur.

Samirə ƏLİYEVA,

“Xalq qəzeti”