Azərbaycan Mərkəzi Bankının sədri Elman Rüstəmov İran Mərkəzi Bankının sədri Valiollah Seifi ilə görüşüb. Bankdan AzərTAc-a bildiriblər ki, görüş zamanı iki ölkənin bank sistemləri, o cümlədən mərkəzi bankları arasında əməkdaşlıq, eləcə də İran İslam Respublikası Prezidentinin Azərbaycana rəsmi səfəri çərçivəsində iki ölkə arasında müxtəlif sahələrdə imzalanmış anlaşma memorandumlarından irəli gələn maliyyə-bank məsələləri ətrafında müzakirələr aparılıb.

E.Rüstəmov ölkələrimiz arasında iqtisadi, o cümlədən bank sahəsində əlaqələrin uğurla inkişaf etdiyini bildirərək, mərkəzi banklar və bütövlükdə bank sektorları arasında gələcək əməkdaşlığın əhəmiyyətini vurğulayıb. O, iranlı qonağa Azərbaycan iqtisadiyyatı, o cümlədən maliyyə-bank sektorunun inkişaf istiqamətləri barədə ətraflı məlumat verib.

İran Mərkəzi Bankının sədri Azərbaycanın maliyyə-bank sektorunda görülən işləri yüksək qiymətləndirib və ölkəmizlə əməkdaşlıqdan məmnunluğunu bildirib. İran və Azərbaycan arasında iqtisadi əlaqələr, o cümlədən bank sistemləri üzrə çoxşaxəli münasibətlər qurulduğunu vurğulayan V.Seifi bu əlaqələrin daha da genişlənəcəyinə əminliyini ifadə edib.