Əfsanəvi Neft Daşlarının 65 illiyi ilə əlaqədar dünyanın səkkizinci möcüzəsi adlandırılan dəniz şəhərində yubiley tədbirləri keçirilib.

AzərTAc xəbər verir ki, bu münasibətlə noyabrın 7-də Neft Daşlarına gələn Azərbaycan Respublikası Dövlət Neft Şirkətinin (ARDNŞ) prezidenti Rövnəq Abdullayev və şirkət rəhbərliyinin nümayəndələri ümummilli lider Heydər Əliyevin abidəsini ziyarət edərək, abidə önünə gül dəstələri düzüblər. ARDNŞ-in nümayəndələri, həmçinin 1957-ci ilin noyabrında Xəzəri fəth edərkən həlak olmuş neftçilərin xatirəsinə ucaldılmış abidə kompleksini, Azərbaycanın müstəqilliyi və ərazi bütövlüyü uğrunda döyüşlərdə şəhid olmuş neftçilərin xatirə abidəsini də ziyarət ediblər.

Sonra qaz seperasiya məntəqəsinin lay təzyiqinin saxlanılması sexinin arasında əvəzedici estakadanın açılışı olub. Estakada “Azneft” İstehsalat Birliyinin “28 May” neft və qazçıxarma idarəsinin sifarişi ilə “Neftqaztikinti” trestinin 4 nömrəli tikinti-quraşdırma idarəsi tərəfindən inşa olunub. Tikintisinə 2010-cu ildən başlanılan estakadanın uzunluğu 1515 metrdir. 

Neft Daşlarının 65 illik yubileyinə həsr olunmuş mərasimdə çıxış edən “Azneft” İB-nin baş direktoru Daşqın İsgəndərov 65 il əvvəl Xəzərdə, Neft Daşlarında açıq üsulla neft hasilatına başlanmasının dünya neft sənayesinin inkişafına böyük təkan verdiyini qeyd edib.

Məlumat verilib ki, 65 il ərzində Neft Daşlarında 180 milyon tondan çox neft, 14 milyard kubmetrdən artıq qaz hasil edilib. Bu müddətdə 2 min 174 quyu qazılıb, eyni zamanda, 300 kilometrə qədər estakada, estakadayanı meydança, özüllər və digər hidrotexniki qurğular tikilərək istifadəyə verilib. 2010-2014-cü illər ərzində Neft Daşlarında 5 min 454 metr uzunluğunda estakada və 22 estakadayanı meydança əsaslı təmir edilib. 2010-cu ildən indiyədək 69 yeni quyu qazılıb və bu quyulardan oktyabrın 1-dək 670 min 861 ton neft hasil olunub. 2012-2014-cü illər ərzində lay və çirkab sularının utilizasiyası, dəniz suyunun saflaşdırılması və məişət tullantılarından təmizlənməsi, atmosferə atılan alçaq təzyiqli qazın yığılması və digər ekoloji layihələr həyata keçirilib.

Dəniz neftçilərini təbrik edən ARDNŞ-in prezidenti Rövnəq Abdullayev 65 il əvvəl Neft Daşlarında açıq üsulla neft hasilatına başlanmasının dünya neft sənayesi tarixində mühüm hadisə olduğunu bildirib. Ulu öndər Heydər Əliyevin Azərbaycanın neft-qaz sənayesinin inkişafında müstəsna xidmətlərini xüsusi vurğulayan R.Abdullayev ötən əsrin 70-ci illərində neft və qaz hasilatının artırılması məqsədilə görülən genişmiqyaslı tədbirlərdən söhbət açıb.

Prezident İlham Əliyevin rəhbərliyi ilə həyata keçirilən enerji strategiyasının uğurlarından danışan ARDNŞ-in prezidenti ölkəmizin regionun və Avropanın enerji təhlükəsizliyində mühüm rol oynayan layihələrin birbaşa təşəbbüskarı və iştirakçısı olduğunu diqqətə çatdırıb.

Mərasimdə Prezident İlham Əliyevin 2014-cü il 6 noyabr tarixli Sərəncamına əsasən Neft Daşlarının 65 illiyi münasibətilə yatağın işlənməsində xidmətlərinə görə təltif olunan dəniz neftçilərinə mükafatlar təqdim edilib.  

Tədbirdə ARDNŞ-in birinci vitse-prezidenti Xoşbəxt Yusifzadə və başqaları çıxış edərək neftçi əməyinə verdiyi yüksək qiymətə görə dövlətimizin başçısına minnətdarlıqlarını bildiriblər.