Ölkənin emal sənayesinin ahəngdar işinin təmin edilməsi istiqamətində reallaşdırılan tədbirlər müsbət nəticələr verir. Cari ilin ötən dövründə sənayenin emal bölməsində 4,3 milyard manatlıq məhsul istehsal olunmuşdur ki, bunun da xeyli hissəsi neft məhsullarının istehsalı ilə məşğul olan müəssisələrin payına düşmüşdür. Dövlət Statistika Komitəsinin məlumatına görə, yanvar-iyul aylarında ölkəmizdə 1 milyard 486,9 milyon manatlıq neft məhsulları istehsal olunmuşdur.

Azərbaycanda neft məhsullarının əsas istehsalçılarından sayılan Heydər Əliyev adına Bakı Neft Emalı Zavodunun genişləndirilməsi, istehsal prosesinin artırılması istiqamətində tədbirlər davam etdirilir. Son zamanlar müəssisənin 55 nömrəli katalitik qurğusunun quru qaz məhsulunun “Azərikimya” İstehsalat Birliyinin etilen-propilen zavoduna verilməsi ilə əlaqədar quru qazın kükürdlu birləşmələrdən, CO və CO2 qatışıqlarından təmizlənməsinə ehtiyac yaranmışdır.Bununla əlaqədar “Neftqazelmitədqiqatlayihə” İnstitutunun layihəsi əsasında quru qazın və dövr etdirilən hidrogen tərkibli qazların amin məhlulu ilə təmizlənməsi sisteminin işlənməsi və doymuş amin məhlulunun regenerasiya blokunun tikintisinə başlanmışdır.

Qurğunun istismara verilməsi ilə dizel yanacağının hidrotəmizlənməsi prosesində dövr etdirilən hidrogen tərkibli qazlar və 55 nömrəli katalitik qurğusunda alınan quru qaz metildietanolamin məhlulu ilə təmizlənəcək. Doymuş amin məhlulunun regenerasiya prosesi isə 54 nömrəli qurğunun bazasında inşa edilən yeni qurğuda həyata keçiriləcəkdir. Qurğuda texnoloji proses HC-900 avtomatlaşdırılmış idarəetmə sistemi ilə idarə olunacaqdır. Hazırda qurğuda son tikinti-quraşdırma və sazlama işləri aparılır.

Yeni qurğunun “Əsrin müqaviləsi”nin 20 illiyi ərəfəsində istismara verilməsi nəzərdə tutulur.

M.YAQUBZADƏ,

“Xalq qəzeti”