Ölkə iqtisadiyyatında əldə olunmuş makroiqtisadi sabitlik, dinamik iqtisadi artım, yoxsulluğun azaldılması və əhalinin sosial rifahının yüksəldilməsi sahəsində qazanılan uğurlar Azərbaycan Respublikasının Prezidenti cənab İlham Əliyevin rəhbərliyi altında həyata keçirilən sistemli və ardıcıl fəaliyyətin nəticəsidir.

Dövlətimizin başçısının 2014-cü ili “Sənaye ili” elan etməsi keyfiyyətcə yeni mərhələdə Azərbaysanın inkişaf etmiş ölkələr səviyyəsinə yüksəlməsi istiqamətində aparılan məqsədyönlü fəaliyyətin məntiqi davamıdır.

Xatırladaq ki,  ölkə  Prezidentinin  2014-cü il 12 mart tarixli sərəncamı ilə Azərbaycan Respublikasında bu ilin “Sənaye ili” elan olunması ilə bağlı Tədbirlər Planı təsdiq edilmişdir. Həmin planda  sənaye potensialının artırılması, təşkilati tədbirlər, sənayenin kadr potensialının və elmi təminatının gücləndirilməsi, normativ hüquqi baza və idarəetmənin təkmilləşdirilməsi, təbliğat və təşviqat işlərilə bağlı tədbirlər öz ifadəsini tapmışdır.

Tədbirlər Planına uyğun olaraq, İqtisadiyyat və Sənaye Nazirliyi kütləvi informasiya vasitələri (KİV) nümayəndələrinin yerli sənaye müəssisələrinin fəaliyyəti və istehsal prosesi ilə yaxından tanış olmaları üçün müxtəlif sənaye  müəssisələrinə infoturlar təşkil edir.  Jurnalistlərin budəfəki səfəri Bakının Xəzər və Suraxanı rayonlarına olmuşdur. KİV nümayəndələri əvvəlcə “Titan Grup”  Sənaye Şirkətlər Birliyində olmuşlar. Jurnalistlərə məlumat verilmişdir ki, adı çəkilən özəl qurum 1990-cı ildən ticarət və sənaye soyuducu avadanlıqlarının istehsalçısı kimi fəaliyyətə başlamışdır. Bu il isə “Titan Grup”un Binə qəsəbəsində qida sənayesi avadanlıqları istehsal edən daha bir müəssisəsi işə salınacaqdır. Layihənin reallaşdırılması məqsədilə   İqtisadiyyat və Sənaye Nazirliyinin Sahibkarlığa Kömək Milli Fondu tərəfindən 10 milyon manat həcmində kredit ayrılmışdır. Müəssisə istixana konstruksiyaları və qida sənayesi bölmələrindən ibarət olacaqdır. Hazırda burada  İtaliyadan gətirilən dəzgahlar quraşdırılır. Zavodda istilik, qənnadı, camaşırxana avadanlıqları, paylama xətləri, mətbəx ləvazimatları və s. istehsal ediləcəkdir.

 Məlumat turu çərçivəsində KİV nümayəndələri “ATEF Şirkətlər Qrupu” MMC-də də olmuşlar. Burada jurnalistlərə məlumat verərək bildirmişlər ki, cəmiyyət 1961-ci ildə yaradılmış Bakı transformator zavodunun bazasında qurulmuşdur.  Xatırladılmışdır ki, zavod keçmiş SSRİ-də mayesiz  transformatorları istehsalı üzrə ixtisaslaşmış yeganə müəssisə idi. Hazırda MMC-yə elektrik avadanlıqları istehsalı ilə məşğul olan dörd müəssisə daxildir. “ATEF Şirkətlər Qrupu” tərəfindən elektrik avadanlıqları, yağ transformatorları, mayesiz transformatorlar, müasir metal konstruksiyalar, modul tipli yarımstansiyalar, paylayıcı qurğular istehsal olunur. Müəssisələrdə buraxılan avadanlıqlar Rusiya, Ukrayna, Qazaxıstan, Türkmənistan, Özbəkistan, Moldova, Gürcüstan və s. ölkələrə ixrac edilir. Zavodlarda Almaniya, Türkiyə, İsveçrə avadanlıqları quraşdırılmışdır. Hazırda MMC-də 1200 nəfər çalışır.

Sonra KİV nümayəndələri ərazidə aparılan tikinti işləri ilə tanış olmuşlar.

Sənaye müəssisələrinə təşkil edilmiş məlumat turu KİV nümayəndələri tərəfindən maraqla qarşılanmış, onların müəssisələrlə bağlı sualları ətraflı cavablandırılmışdır.

“Sənaye ili” çərçivəsində İqtisadiyyat və Sənaye Nazirliyi tərəfindən digər sənaye müəssisələrinə də infoturların təşkili nəzərdə tutulur.

Vaqif BAYRAMOV,

“Xalq qəzeti”