Azərbaycanda davamlı və dayanıqlı iqtisadi inkişafa nail olunub, makroiqtisadi sabitlik təmin edilib, əlverişli biznes və investisiya mühiti yaradılıb. Bunun nəticəsidir ki, xarici iş adamlarının ölkəmizə marağı artır, yatırılan investisiyaların həcmi ildən-ilə çoxalır.

Bu fikirləri iyulun 15-də Bakı Biznes Mərkəzində keçirilən Azərbaycan-Rusiya biznes forumunda Azərbaycanda İxracın və İnvestisiyaların Təşviqi Fondunun (AZPROMO) rəhbəri Rüfət Məmmədov səsləndirib.

AzərTAc xəbər verir ki, forumda hər iki tərəfdən rəsmi şəxslərlə yanaşı, kimya sənayesi avadanlığı, elektroenergetika, sənaye, İKT və digər sahələrdə fəaliyyət göstərən 60-dan çox iş adamı iştirak edirdi.

İki ölkə arasında iqtisadi sahədə 30-dan çox sənədin imzalandığını xatırladan R.Məmmədov dedi ki, bu gün Rusiya Azərbaycanın əsas ticarət tərəfdaşlarından biridir. Ötən il Azərbaycan və Rusiya arasında ticarət dövriyyəsi 10 faizdən çox artıb. Ölkəmizdə Rusiya kapitallı 570 şirkət fəaliyyət göstərir, Azərbaycan şirkətləri də Rusiyanın müxtəlif regionlarında uğurla çalışırlar.

R.Məmmədov rusiyalı iş adamlarını ölkəmizdə yaradılan əlverişli biznes və investisiya mühitindən yararlanmağa, Azərbaycan sahibkarları ilə fəal əməkdaşlığa dəvət etdi.

Rusiyanın Tomsk vilayətinin Ticarət və Sənaye Palatasının xarici iqtisadi fəaliyyətin inkişafı mərkəzinin direktoru Aleksandr Belyayev Rusiya iqtisadiyyatı barədə məlumat verərək, iş adamları arasında əlaqələrin genişləndirilməsində ikitərəfli görüşlərin və biznes forumların mühüm rol oynadığını qeyd etdi.

Biznes forumda AZPROMO-nun nümayəndəsi Zaur İbrahimov Azərbaycanın biznes mühiti və investisiya imkanlarına dair təqdimatı maraqla qarşılandı.

Sonra Azərbaycanın “Səhhət” klinikası və Rusiyanın “Korporativ Tibb Mərkəzi” arasında əməkdaşlığa dair niyyət protokolu imzalandı.

Tədbir iş adamlarının əməkdaşlıq imkanlarının müzakirə olunduğu ikitərəfli görüşlərlə davam etdirildi.