Azərbaycan  Respublikasının  Dövlət  Statistika   Komitəsi  xəbər verir ki, ölkə əhalisinin sayı ilin əvvəlindən  43,2 min  nəfər  və  ya  0,5  faiz  artaraq  2014-cü  il iyun ayının 1-də  9 milyon 520,3  min  nəfərə çatmışdır.  Əhalinin sıxlığı bir kvadrat  kilometrə 110 nəfərdir. Əhalinin ümumi sayının 53,2 faizini şəhər, 46,8  faizini isə kənd sakinləri  təşkil edir, 49,7  faizi kişilərdən, 50,3 faizi  qadınlardan ibarətdir.  Hazırda hər 1000 nəfər kişiyə 1011 qadın düşür.

Cari ilin ilk 5 ayı ərzində ölkədə 67,3 min, yaxud hər gün orta hesabla 445 körpə doğulmuş, əhalinin hər  1000 nəfərinə hesabı ilə  bu göstərici 17,3 olmuşdur. Doğulan körpələrin 53,6 faizi oğlan, 46,4  faizi isə qız uşaqlarıdır.  Körpələrin 1150-si əkiz, 30-u isə üçəm doğulmuşdur. 

İlin əvvəlindən  ölkədə 24,4 min ölüm halı qeydə alınmış və  əhalinin hər 1000  nəfərinə hesabı ilə ötən ilin müvafiq dövrü  ilə müqayisədə  ölüm əmsalı dəyişməyərək eyni səviyyədə (6,3) qalmışdır.

Bu ilin yanvar-may  ayları ərzində rəsmi orqanlar  tərəfindən  30,9 min nikah və 5 min boşanma  qeydə alınmış və əhalinin hər 1000 nəfərinə hesabı ilə ötən ilin müvafiq dövrü ilə  müqayisədə nikah və boşanmaların sayı dəyişməyərək  eyni səviyyədə ( müvafiq olaraq 7,9 və 1,3) qalmışdır.

Dövlət Miqrasiya Xidmətinin və  Daxili İşlər Nazirliyinin   müvafiq  qurumları  tərəfindən cari ilin 5 ayı ərzində  daimi  yaşamaq  üçün  Azərbaycana 675  nəfər  gələn  və 319 nəfər ölkədən gedən qeydə alınmışdır.

Samirə ƏLİYEVA,

“Xalq qəzeti”