Azərbaycan iqtisadiyyatı MDB-nin altı ölkəsinin ümumi iqtisadiyyatını üstələyir. “APA -Economics”in məlumatına görə, bu barədə Dünya Bankının (DB) 191 ölkədə ümumi daxili məhsulun (ÜDM) həcminə görə açıqladığı reytinqində deyilir.

Hesabata görə, son bir ildə ölkədə istehsal olunan son məhsul və göstərilən xidmətlərə görə Azərbaycan 191 ölkə arasında 67-ci yerdə qərarlaşmışdır. DB-nin hesablamalarına görə, Azərbaycanda ÜDM 73,6 milyard dollar təşkil edir.

Reytinqə əsasən, Azərbaycan iqtisadiyyatı keçmiş SSRİ respublikalarından Moldova, Gürcüstan, Ermənistan, Tacikistan, Qırğızıstan və Estoniyanın iqtisadiyyatlarının cəminə bərabərdir. Onu da qeyd edək ki, Ermənistan 10,4 milyard dollarlıq iqtisadiyyatı ilə MDB regionunda və dünyada ən aşağı yerlərdən birini – 135-ci yeri tutur. Müqayisə üçün qeyd edək ki, Azərbaycan iqtisadiyyatı Ermənistan iqtisadiyyatını 7 dəfədən artıq üstələyir.

Reytinqə ABŞ başçılıq edir. Bu ölkənin iqtisadiyyatı 16,8 trilyon dollar təşkil edir. İkinci yeri isə 9,2 trilyon dollarlıq göstərici ilə Çin tutur. MDB ölkələrində isə ən yaxşı göstəricilər Rusiya və Qazaxıstandadır. Belə ki, bu ölkələrdə ÜDM-in həcmi müvafiq olaraq 2,1 trilyon dollar və 224,4 milyard dollar təşkil edir.