Son zamanlar Dövlət Neft Şirkəti tərəfindən neft hasilatının sabit saxlanması məqsədilə bir sıra zəruri tədbirlər həyata keçirilir, köhnə quyuların yenidən istismara qaytarılması üçün əsaslı təmir işlərinə diqqət artırılır. 

Bu baxımdan istismarda olan yataqlar arasında öz zənginliyi ilə seçilən “Günəşli” yatağında da konkret işlər görülür. Bu günlərdə adıçəkilən yataqdakı  13-cü özüldən 436 nömrəli quyu əsaslı təmirdən sonra istismara verilmişdir. Xatırladaq ki, quyu fasilə lay dəstəsindən 3062-3043 metr intervaldan qaz-lift üsulu ilə gündəlik 70 ton neft və 11500 kubmetr qaz hasilatı ilə istismara daxil edilmişdir.

Quyuda istismar işləri “28 May” Neft və Qazçıxarma İdarəsi  tərəfindən həyata keçirilir.

Bundan əlavə, təmir briqadaları ölkənin yeraltı qaz anbarlarının tutumunun artırılması, qaz tədarükünün tələb olunan səviyyədə təşkili üçün də zəruri tədbirlər görürlər. Bu yaxınlarda “Qaradağ” yatağındakı 476 nömrəli quyu təmirdən sonra istismara verilmişdir. Məhsuldar qatın VII horizontunda 3379-3331 metr intervalda süzgəci açılmış quyuya sutkada 275 min kubmetr qaz vurulur ki, həmin qazdan da payız-qış mövsümündə istifadə olunacaqdır. Həmin quyuda isə istismar işləri “Azneft” İstehslat Birliyinin Qaz Anbarları İstismarı İdarəsi tərəfindən həyata keçirilir.

Yeri gəlmişkən, Dövlət Neft Şirkətinin Kompleks Qazma İşləri Tresti tərəfindən yeni quyuların qazılıb istismara verilməsi istiqamətində işlər də intensiv şəkildə davam etdirilir. Hazırda yeraltı zənginliyə yol açan qazmaçılar  “Neft Daşları” yatağındakı 418a nömrəli platformadan 2615 nömrəli quyuda qazma işləri aparırlar. Xatırladaq ki, Qala lay dəstəsinə qazılan quyunun layihə dərinliyi 1100 metr təşkil edir.

 Geoloqların hesablamalarına əsasən, quyudan sutkada 10 ton neft hasil olunacağı nəzərdə tutulur.

M. YAQUBZADƏ,

“Xalq qəzeti”