SOCAR-AQŞ birgə müəssisəsi “Günəşli” yatağında 230 saylı quyuda  tikinti işlərinə başlamışdır. Xatırladaq ki, bu, adıçəkilən müəssisə tərəfindən cari ildə qazıntısına başlanmış ilk hasilat quyusudur. “Günəşli” yatağındakı 11 nömrəli dərin dəniz stasionar özülündən “Fasilə’’ lay dəstəsinə  qazılan quyunun layihə dərinliyi 3230 metr təşkil edir.

Müəssisə tərəfindən daha bir quyu isə “Günəşli’’ yatağının dayaz sulu hissəsində quraşdırılmış  13 nömrəli stasionar dəniz özülündən qazılır. Bu yaxınlarda qazıntısına start verilmiş 351 saylı quyunun layihə dərinliyi 3100 metrdir. Hazırda tikintisi gedən quyu “Fasilə’’ lay dəstəsinə qazılır. Xatırladaq ki, hər iki quyunun  sifarişçi Dövlət Neft Şirkətinin “Azneft” İstehsalat Birliyidir.

SOCAR-AQŞ əvvəllər olduğu kimi, bu quyuların tikintisi zamanı da əməyin təhlükəsizliyi, ekologiyanın qorunması, quyu tikintisinin keyfiyyəti, işlərin iqtisadi cəhətdən səmərəli olmasını və quyu tikintisinin vaxtından əvvəl yekunlaşdırılmasını əsas məqsəd kimi qarşıya qoymuşdur.

Yeri gəlmişkən, SOCAR-AQŞ “Günəşli” yatağının dayaz hissəsində  yerləşən iki dərin dəniz stasionar özülündə  üç qazma qurğusundan istifadə etməklə qazma işləri aparır. Müəssisə, həmçinin “Bahar” Enerji  Əməliyyat Şirkətinin qazma proqramı çərçivəsində bir qazma qurğusu vasitəsilə qazma işləri həyata keçirir.

M. YAQUBZADƏ,

 “Xalq qəzeti”