Son illər ölkəmizdə neft hasilatının sabit saxlanması və qaz istehsalının artırılması istiqamətində mühüm tədbirlər həyata keçirilir. Bu məqsədlə yeni hasilat quyuları qazılır, fəaliyyətsiz fondda olan quyuların yenidən  istismara qaytarılması üçün zəruri tədbirlər görülür.

Azərbaycanın neft-qaz sənayesində əhəmiyyətli rola malik “Günəşli” yatağında da bu baxımdan konkret tədbirlər həyata keçirilir. Dövlət Neft Şirkətinin socar.az saytının yaydığı xəbərə görə, adıçəkilən yatağın istismarını həyata keçirən “28 May” Neft və Qazçıxarma İdarəsi tərəfindən yeni-yeni quyular qazılmaqla yanaşı, fəaliyyətsiz fondda olan quyular da texniki tədbirlər aparılmaqla istismara qaytarılır. Bu günlərdə “Günəşli” yatağındakı 14 nömrəli özüldə 305 nömrəli quyu əsaslı təmirdən sonra istismara verilmişdir. Xatırladaq ki, quyu Fasilə lay dəstəsindən 2890-2875 metr intervaldan qaz-lift üsulu ilə sutkalıq 90 ton neft və 10 min kubmetr qaz hasilatı ilə istismar fonduna qəbul edilmişdir. Hazırda idarənin təmir briqadaları tərəfindən fəaliyyətsiz fondda olan digər quyuların da yenidən istismara qaytarılması istiqamətində işlər davam etdirilir.

M. YAQUBZADƏ,

“Xalq qəzeti”