Azərbaycanın kənd təsərrüfatı naziri Heydər Əsədov ərzaq, kənd təsərrüfatı və bağçılıq üzrə beynəlxalq “Yaşıl həftə” sərgisində iştirak etmək məqsədi ilə Almaniyaya səfəri çərçivəsində kənd təsərrüfatı nazirlərinin altıncı Berlin sammitində iştirak etmişdir.

Nazirliyin mətbuat xidmətindən AzərTAc-a bildirmişlər ki, “Kənd təsərrüfatının gücləndirilməsi, dayanıqlılığın artırılması, ərzaq və qidalanmanın təmin edilməsi” mövzusunda keçirilmiş sammitə dünyanın 71 ölkəsinin kənd təsərrüfatı nazirləri və nazir müavinləri, beynəlxalq təşkilatların yüksək vəzifəli şəxsləri qatılmışlar.

Sammitdə planetimizdə əhalinin durmadan artması və ərzaq məhsullarına olan tələbatın çoxalması kontekstində məhdud ehtiyatlardan səmərəli istifadə etməklə qlobal, regional və milli səviyyələrdə ərzaq təhlükəsizliyinin təmin olunması, insanlara təhlükəsiz və keyfiyyətli ərzaq əldə etmək imkanları yaradılması məqsədi ilə birgə səylərin artırılması məsələləri müzakirə olunmuşdur.

Sammitin yekun bəyannaməsində bu çağırışlara səmərəli cavab vermək üçün bitki sortlarından və heyvan cinslərindən davamlı və səmərəli istifadənin təşviq edilməsi, kənd təsərrüfatı üzrə genetik ehtiyatlardan istifadə üzrə qlobal səylərin habelə, tədqiqat işlərinə və bilik mübadiləsinə dəstəyin gücləndirilməsi, kənd təsərrüfatı sahəsinə sərmayə qoyuluşunun artırılması və digər məsələlər öz əksini tapmışdır.