Azərbaycan Respublikasında avtomobil yolları şəbəkəsinin yeniləşdirilməsi və inkişafına dair Dövlət Proqramına (2006-2015-ci illər) əsasən “Gəndob-Xaçmaz-Yalama-Rusiya Federasiyası dövlət sərhədi” avtomobil yolunun tikintisi həyata keçirilir.

ARDNŞ- dən aldığımız məlumatda deyilir ki, işçi layihəyə əsasən, avtomobil yolunun 133,8 kilometrliyində, 135,935 kilometrliyində, 137,278 kilometrliyində, 178,490 kilometrliyində (sol qol ilə 2 kəsişmə), 178,860 kilometrliyində, 178,9 kilometrliyində, ümumilikdə 7 yerdə 1220 millimetrlik “Mozdok-Qazıməmməd” magistral qaz kəməri ilə yolun kəsişdiyi nəzərə alınaraq, müvafiq normativ sənədlərin tələblərinə və texniki şərtlərə uyğun olaraq kəsişmələrin layihə həlləri hazırlanmışdır. Tikinti işləri “Azərinşaatservis” MMC tərəfindən aparılır.

Layihənin dövlət əhəmiyyətli olmasını əsas götürərək kəsişmələrdə tikinti işərinin aparılmasına təhlükəsiz şərait yaradılması məqsədi ilə “Mozdok-Qazıməmməd” magistral qaz kəmərində texnoloji rejimlər dəyişdirilmiş, işçi təzyiq 12 atmosferə salınmışdır. Bu səbəbdən Rusiya Federasiyasına qazın nəqli müvəqqəti dayandırılmışdır.

Məlumatda daha sonra bildirilir ki, kəsişmələrdə tikinti işlərinin aparılması ilə əlaqədar olaraq həmçinin “Mozdok-Qazıməmməd” magistral qaz kəmərində 206-cı və 287-ci kilometrlərdə aşkar edilmiş sızmaların ləğv edilməsi üçün işlərə də başlanılmışdır. Bu məqsədlə təmir işləri ARDNŞ-nin “Qaz İxrac” İdarəsi tərəfindən aparılır.

Samirə ƏLİYEVA,

“Xalq qəzeti”