Paytaxtın Nizami rayonunda təmizlik-abadlıq işlərinə diqqət getdikcə artırılır, rayonun sanitar vəziyyəti  gündən-günə yaxşılaşdırılır. Bu məqsədlə rayon ərazisində səliqə-sahman yaradılmasına, məişət tullantılarının vaxtlı-vaxtında daşınmasına xüsusi diqqət yetirilir.

İndən belə isə rayon ərazisində məişət tullantılarının daşınması daha yüksək səviyyədə həyata keçiriləcək. Bu yaxınlarda Azərbaycan Respublikası Dövlət Neft Şirkətinin maliyyə dəstəyi ilə  məişət tullantılarının idarə olunmasının yaxşılaşdırılması məqsədilə Nizami Rayon Mənzil Kommunal Təsərrüfat Birliyi üçün yeni 15 ədəd xüsusi təyinatlı nəqliyyat vasitəsi alınmışdır. Rayon rəhbərliyinin, müvafiq strukturların və ictimaiyyət nümayəndələrinin iştirakı ilə yeni nəqliyyat vasitələrinə baxış keçirilmişdir.

Bu münasibətlə keçirilən tədbirdə çıxış edən Nizami Rayon İcra Hakimiyyətinin başçısı Tahir Budaqov yeni maşın və mexanizmlərin alınmasını rayonun sosial həyatında mühüm hadisə kimi dəyərləndirdi. Qeyd olundu ki, rayon ərazisində məişət tullantılarının toplanması və daşınması üçün nəzərdə tutulmuş xüsusi təyinatlı nəqliyyat vasitələri tamamilə köhnəlib sıradan çıxdığından  məişət tullantılarının vaxtlı-vaxtında daşınması mümkün olmurdu. Rayon ərazisinin sanitar vəziyyətinin tələb olunan səviyyədə saxlanılmaması isə sakinlərin haqlı narazılığına səbəb olurdu. Yeni texnikanın istifadəyə verilməsinin rayonda məişət tullantılarının toplanmasına və sanitar-təmizlik işlərinin daha yaxşı təşkilinə şərait yaradacağını diqqətə çatdıran T.Budaqov Dövlət Neft Şirkətinin rəhbərliyinə rayon sakinləri adından təşəkkür etdi, əlaqədar təşkilatların rəhbərlərinə bir sıra konkret tapşırıq və tövsiyələr verdi.

Rayon ağsaqqalları və ziyalılar çıxış edərək rayon ərazisində təmizliyin saxlanılmasında və əhalinin sosial-məişət şəraitinin yaxşılaşdırılması istiqamətində görülən işlərdən məmnun olduqlarını bildirdilər.

Tədbirdə Milli Məclisin deputatları Rasim Musabəyov və Sədaqət Vəliyeva iştirak edirdilər.

Mirbağır YAQUBZADƏ, “Xalq qəzeti”