Martın 6-da Bakıda Azərbaycan-Yunanıstan biznes forumunun açılış mərasimi olmuşdur. AzərTAc xəbər verir ki, mərasimi açan Yunanıstanın Azərbaycandakı səfiri İoannis Metaksas iki ölkə arasındakı əlaqələrin inkişafından, biznes forumun əhəmiyyətindən danışmışdır.

Sənaye və energetika naziri Natiq Əliyev tədbirin iki ölkə arasındakı əlaqələrin inkişafına müsbət təsirindən söhbət açmışdır.

Nazir bildirmişdir ki, Azərbaycan-Yunanıstan iqtisadi əlaqələri uğurla inkişaf edir. Biznes forum iki ölkənin iqtisadi əlaqələrinin tərəqqisinə töhfəsini verəcəkdir. Münasibətlərimizdə enerji məsələləri mühüm yer tutur. Bu sahədə yeni layihələr həyata keçirilməkdədir. Biznes forumun keçirilməsi ticarət əlaqələrimizi daha da genişləndirəcəkdir.

Bakıda olmağından məmnunluğunu bildirən Yunanıstan xarici işlər nazirinin müavini Dimitris Kurkulas bu tədbirin ikitərəfli əlaqələrimizin genişlənməsinə, ortaq məqsədlərimizə çatmağına töhfə verəcəyini demişdir. O vurğulamışdır ki, Azərbaycan regionda mühüm rol oynayır və strateji əhəmiyyətə malikdir. Son illərdə ikitərəfli əlaqələrimiz daha da genişlənmişdir və biz  bu münasibətlərin daha da dərinləşməsində maraqlıyıq.

Dimitris Kurkulas hər iki ölkənin iş adamları arasında müxtəlif sahələrdə əlaqələrin genişlənməsini vacib saymışdır.

Tədbir ziyafətlə davam etdirilmişdir.