Bu ili Azərbaycan ilə Avropa İttifaqı (Aİ) arasında enerji sektorunda əməkdaşlığın genişləndirilməsi baxımından vacib hesab etmək olar. Trend-in məlumatına görə, bunu çərşənbə günü Bakıda Aİ-nin Energetika Məsələləri üzrə baş direktorluğunun rəhbəri Paola Abre Markes Azərbaycanla Aİ arasında energetika sahəsində anlaşma memorandumu çərçivəsində keçirilən müşavirə zamanı bildirmişdir.

Markes öz fikrini onunla əsaslandırmışdır ki, 2013-cü ildə Azərbaycanın “Şahdəniz” qaz-kondensat yatağının işlənməsinin ikinci mərhələsi ilə bağlı yekun investisiya qərarı, eləcə də Aİ-nin qaz tədarükü layihələri üzrə qərar qəbul ediləcək.

Onun sözlərinə görə, ötən il də tərəflər arasında energetika sahəsində əməkdaşlıq baxımından çox mühüm olmuşdur. Markes habelə “Trans-Anadolu” qaz kəməri layihəsi üzrə hökumətlərarası sazişin imzalanması və həmin sənədin Azərbaycanla Türkiyə arasında ratifikasiya olunmasını mühüm hadisə adlandırmışdır.

Markesin dediyi kimi, 2006-cı ildə tərəflər arasında enerji dialoqu üzrə mühüm irəliləyişə nail olunmuşdur. Habelə Azərbaycanla Aİ arasında əməkdaşlığın genişləndirilməsi nöqteyi-nəzərindən mühüm əhəmiyyət kəsb edən “Cənub qaz dəhlizi” layihəsi reallaşmağa yaxındır.