2011-ci ilin birinci yarısında Azərbaycan 138 xarici dövlətlə 17,4 milyard ABŞ dolları məbləğində ticarət əməliyyatları aparmışdır. 
Dövlət Statistika Komitəsindən verilən məlumata görə, əmtəə mübadiləsinin 2,9 milyard dolları MDB dövlətləri, 14,5 milyard dolları digər ölkələrlə həyata keçirilmişdir.
2010-cu ilin ilk altı ayı ilə müqayisədə ölkə üzrə xarici ticarət dövriyyəsinin həcmi müqayisəli qiymətlərlə 9,3 faiz, o cümlədən MDB dövlətləri üzrə 32,7 faiz, digər dövlətlər üzrə 6,1 faiz artmışdır.
Xarici ticarət dövriyyəsinin 13,1 milyard dollarını Azərbaycandan ixrac olunmuş mallar, 4,3 milyard dollarını ölkəmizə idxal edilmiş məhsullar təşkil edir, 8,7 milyard dollarlıq müsbət xarici ticarət saldosu yaranmışdır. Xarici ticarət əməliyyatlarının beşdə dörd hissəsindən çoxu (80,7 faizi) İtaliya, Fransa, Rusiya Federasiyası, Amerika Birləşmiş Ştatları, Ukrayna, Türkiyə, Malayziya, İndoneziya, Belarus, Almaniya, Hindistan, İsrail və Çin ilə aparılmışdır.