2010-cu ildə Rusiya-Azərbaycan ticari-iqtisadi əməkdaşlığının inkişafında sabitlik əldə edilmişdir. Ekspertlərin bu fikri Azərbaycanla Rusiya arasında iqtisadi əməkdaşlıq üzrə hökumətlərarası komissiyanın bu günlərdə Rusiya paytaxtında keçirilmiş 13-cü iclasının sənədlərində öz əksini tapmışdır.
Belə ki, Rusiyanın Federal Gömrük Xidməti tərəfindən Komissiyanın ekspertlərinə verilmiş məlumata görə, 2010-cu ildə ölkələrimiz arasında əmtəə dövriyyəsinin həcmi 9,4 faiz artaraq 1947,9 milyon ABŞ dolları təşkil etmişdir. Rusiya Federasiyasından Azərbaycan Respublikasına malgöndərmələrin həcmi 6,3 faiz artaraq 1562,4 milyon dollara, Azərbaycan Respublikasından Rusiya Federasiyasına malgöndərmələrin həcmi isə 23,8 faiz artaraq 385,6 milyon ABŞ dollarına çatmışdır.
Komissiya hesab edir ki, Azərbaycan Respublikası ilə Rusiya Federasiyasının subyektləri arasında əlaqələrin inkişafı, müştərək müəssisələr yaradılması, təsərrüfatçılıq subyektlərinin nümayəndəliklərinin və filiallarının açılması, onların fəaliyyətinin qaydaya salınması və səmərəsinin artırılması üzrə tədbirlər görülməsi ikitərəfli əməkdaşlığın və əmtəə dövriyyəsinin artmasına imkan yaradan mühüm amillərdir. Məsələn, 2009-cu ilin noyabr ayından Bakıda VTB Bankı Açıq Səhmdar Cəmiyyətinin (Azərbaycan) ofisi işləyir, 2010-cu ilin iyun ayından Azərbaycanda "Rusiya Kənd Təsərrüfatı Bankı" Açıq Səhmdar Cəmiyyətinin nümayəndəliyi, 2010-cu ilin sentyabr ayından Krasnodar vilayətinin Beloreçensk rayonunda "Azersun Holdinq"in investisiyaları hesabına çay fabriki işləyir, konserv zavodunun tikintisi başlanmışdır.
Ekspertlər əmindirlər ki, ölkələrimiz arasında iqtisadi sahədə əməkdaşlığın möhkəmlənməsi prosesi davam edir, konkret layihələr həyata keçirilir, dövlətlərarası əməkdaşlığı fəallaşdırmağa, işgüzar dairələrin əlaqələrinin genişlənməsinə imkan yaradan çoxsaylı tədbirlər görülür.

Asya HACIZADƏ AzərTAcın xüsusi müxbiri
Moskva