İqtisadiyyat Nazirliyinin Sahibkarlığa Kömək Milli Fondu Qusar rayonunda işgüzar forum keçirmişdir. Nazirliyin mətbuat xidmətinin məlumatına görə, işgüzar forum çərçivəsində sahibkarlarla mövcud iqtisadi potensialdan daha səmərəli istifadə edilməsi məqsədilə müzakirələr aparılmışdır.

Qusar rayonu üzrə sahibkarlıq subyektlərindən startap və kənd turizmi layihələrinin  maliyyələşdirilməsi, tərəvəzçilik və intensiv bağçılıq təsərrüfatlarının yaradılması, müasir meyvə-tərəvəz və süd emalı müəssisələrinin təşkili və ixtisaslaşdırılmış “yaşıl maket” və logistik mərkəzinin yaradılması istiqamətlərdə investisiya layihələrinin maliyyələşdirilməsi üçün təkliflərin qəbulu məqsədəuyğun hesab edilmişdir.

Sahibkarlar investisiya layihələrinin maliyyələşdirilməsi məqsədilə müvəkkil kredit təşkilatları vasitəsilə İqtisadiyyat Nazirliyinin Sahibkarlığa Kömək Milli Fonduna müraciət edə bilərlər.

Əlipənah BAYRAMOV,
“Xalq qəzeti”