Azərbaycan Təbii Sərvətlər və Ekologiya İşçiləri Həmkarlar İttifaqının IV qurultayı keçirilmişdir. Qurultayda Azərbaycan Respublikası ekologiya və təbii sərvətlər nazirinin müavinləri Firdovsi Əliyev və Rauf Hacıyev, Azərbaycan Həmkarlar İttifaqları Konfederasiyası sədrinin müavini Cavanşir Alxasov, sahə həmkarlar ittifaqı respublika komitələrinin sədrləri, departament, idarə rəhbərləri, həmkarlar fəalları iştirak etmişlər.
Təbii Sərvətlər və Ekologiya İşçiləri Həmkarlar İttifaqı Respublka Komitəsinin sədri Telman Quliyev komitənin 2012-2017- ci illər dövründə fəaliyyəti barədə hesabat məruzəsi ilə çıxış etmişdir. O qeyd etmişdir ki, III qurultaydan ötən beş ildə Vətənimiz və təşkilatımız üçün bir çox hadisələrlə yadda qalmışdır. Ulu öndər Heydər Əliyevin əsasını qoyduğu demokratik dövlət quruculuğu prosesi respublika Prezidenti cənab İlham Əliyev tərəfindən böyük uğurla davam etdirilir.
Hesabat dövrü ərzində ölkəmizin ictimai-siyasi həyatında baş verən böyük dəyişikliklər həmkarlar ittifaqı təşkilatlarının fəaliyyətinə öz müsbət təsirini göstərmişdir. Təbii Sərvətlər və Ekologiya İşçiləri Həmkarlar İttifaqı ötən qurultaydan sonra qarşıya qoyulmuş məqsəd və məramların yerinə yetirilməsi üçün üzvlərin ittifaqda sıx birliyinə nail olmuşdur. Həmkarlar ittifaqı üzvləri təşkilatımızın fəaliyyətində fəal iştirak edərək, onun ətrafında sıx birləşiblər. Həmkarlar ittifaqı təşkilatı əməkçilərin hüquqlarının qorunması, iş şəraitlərinin yaxşılaşdırılması, istirahətlərinin təşkili üçün işəgötürənlərlə birgə çalışaraq müəyyən nailiyyətlər əldə etmişlər. İşçilərin maddi rifah halının yaxşılaşdırılması, əmək haqqının səviyyəsi,əməyin mühafizəsi, işçilərin həyat sağlamlığının, sosial-iqtisadi mənafelərinin qorunması,səmərəli əmək fəaliyyətinə görə mükafatlandırılması və digər sahələrdə qarşıda duran məsələlərin həlli istiqamətində irəliyə doğru addımlar atılmışdır.
Təbii Sərvətlər və Ekologiya İşçiləri Həmkarlar İttifaqının seçkili orqanında 9 nəfərdən ibarət İcraiyyə Komitəsi, 31 nəfər məclis üzvü fəaliyyət göstərir. Sahə həmkarlar ittfaqı təşkilatlarında ümumilikdə seçkili orqanlarda 1285 nəfər çalışır (onlardan 674 nəfəri qadınlardır).
Mərizəçi sahə həmkarlar ittifaqları təşkilatlarının qarşısında qoyulan əsas vəzifələr, xüsusən qadın və gənclərə diqqətin artırılması, kadrlarla işin gücləndirilməsi məsələlərindən danışaraq qeyd etmişdir ki, bazar iqtisadiyyatı, həmkarlar ittifaqlarındakı yeni vəziyyət həmkarlar ittifaqı işçilərindən yeni stil, yeni iş üsulları, biliklərin zənginləşdirilməsini tələb edir. Bəzi həmkarlar ittifaqı kadrlarının yaşlanması ilə əlaqədar qarşıdakı beşillikdə növbəti məsələlərin reallaşdırılması üçün həmkarlar ittifaqı kadrlarının hazırlanması, həmkarlar ittifaqı orqanlarına bu işi bilən və sevən, fəhlə və işçilərin əmək, sosial-iqtisadi hüquqlarının sahibkarlar tərəfindən pozulmasına effektiv surətdə qarşı durmağa qadir olan şəxslərin seçilməsi, təlimatlandırılması və yerləşdirilməsinə daha çox diqqət ayrılacadır.
Təbii Sərvətlər və Ekologiya İşçiləri Həmkarlar İttifaqı Respublika Komitəsi idman sahəsinə də xüsusi diqqət ayırır. Mütəmadi olaraq sahə üzv təşkilatları arasında yarışlar keçirilır, qaliblərə mükafatlar verilir. Ekologiya və təbii sərvətlər naziri Hüseynqulu Bağırovun təşəbbüsü ilə yaradılmış “Ekosport” və “Geosport” idman klubları təşkilatımız tərəfindən maliyyələşdirilir.
2012-ci ilin yanvar ayında Belçikada keçirilən buzadırmanma üzrə beynəlxalq turnirdə klubumuzun üzvləri də iştirak etmişlər. Beynəlxalq yarışlarda, yoldaşlıq görüşlərində idmançılara yaxından kömək göstərilir. Hər il Qusar rayonunun Ləzə kəndində keçirilən buzadırmanma üzrə respublika çempionatının təşkilində yaxından iştirak edilir.
Məruzə ətrafında çıxışlar olmuşdur. Zəngilan Rayon Ekologiya İdarəsinin rəisi Xuduş İsgəndərov, Elmi-Tədqiqat Meşəçilik İnstitutu HİK-in sədri Cəmilə Məhərrəmova, Ətraf Mühitin Çirklənməsinin Monitorinqi Mərkəzi HİK-in sədri Nazim Hümbətov, Mineral Xammal Elmi-Tədqiqat İnstitutu HİK-in sədri Bayan Rəhimova çıxış edərək ötən dövrdə Həmkarlar İttifaqının Respublika Komitəsinin işini qənaətbəxş hesab etdiklərini bildirmiş, sahə respublika komitəsinə, yeni seçiləcək heyətə gələcək fəaliyyətlərində uğurlar arzulamışlar.
Qurultay nümayəndələri tərəfindən açıq səsvermə yolu ilə Telman Quliyev yenidən Təbii Sərvətlər və Ekologiya İşçiləri Həmkarlar İttifaqının Respublika Komitəsinin sədri seçilmişdir.
Azərbaycan Respublikası Ekologiya və Təbii Sərvətlər nazirinin müavini Firdovsi Əliyev, Azərbaycan Həmkarlar İttifaqları Konfederasiyası sədrinin müavini Cavanşir Alxasov görülən işlər barədə danışmış, həmkarlar təşkilatlarının qarşısında duran məsələlərin həlli istiqamətində sahə respublika komitəsinə, yeni seçilən heyətə tövsiyələrini vermişlər.
Yığıncaq 2018- ci ildə keçiriləcək AHİK-in V qurultayında yekdilliklə Milli Məclisin deputatı Səttar Mehbalıyevin yenidən Azərbaycan Həmkarlar İttifaqları Konfederasiyasının sədri vəzifəsinə namizədliyinin irəli sürülməsi və müdafiə olunması barədə qərar qəbul etmişdir.
Bir qrup Həmkarlar İttifaqı fəalı Ümumhəmkarlar İttifaqı Federasiyasının, Müstəqil Dövlətlər Birliyi Meşə İşçiləri Həmkarlar İttifaqı Federasiyasının, Təbii Sərvətlər və Ekologiya İşçiləri Həmkarlar İttifaqı Respublika Komitəsinin fəxri fərmanları ilə təltif olunmuşdur.
Afət SADIQOĞLU,
“Xalq qəzeti”
© İstifadə edilərkən "Xalq qəzeti"nə istinad olunmalıdır.