Ekologiya və Təbii Sərvətlər Nazirliyinin Ətraf Mühit üzrə Milli Monitorinq Departamenti Kür və Araz transsərhəd çaylarının, həmçinin onların transsərhəd qollarının çirklənmə vəziyyətini öyrənmək məqsədilə aprel ayının III ongünlüyü üçün monitorinq həyata keçirmişdir.

Aprel ayının III ongünlüyündə Kür çayında su sərfi aprel ayının II ongünlüyünə nisbətən saniyədə 98 kubmetr azalaraq saniyədə 367 kubmetr təşkil etmişdir. Monitorinqin nəticələrinə əsasən Gürcüstan və Ermənistan ərazilərindən təmizlənmədən birbaşa su obyektlərinə axıdılan məişət tullantıları və sənaye müəssisələrinin çirkab sularının təsiri nəticəsində Kür çayı və onun qollarında biogen maddələrin miqdarının normadan dəfələrlə artıq olması müşahidə olunmuşdur. Suyun tərkibindəki spesifik çirkləndiricilərdən fenol və mis birləşmələri yol verilən qatılıq həddini (YVQH) keçmişdir.

Belə ki, Şıxlı-2 məntəqəsində və Ağstafaçay su anbarında fenollar 4, mis birləşmələri 3, Ağstafaçayda fenollar 2, mis birləşmələri 4 dəfə YVQH-ni keçmişdir.

Aprel ayının III ongünlüyündə aparılan monitorinqlərin nəticələrinə görə Araz çayı üzrə Horadiz məntəqəsində suyun əsas çirkləndiricilərindən olan fenollar 3, mis birləşmələri 2, Birinci Şahsevəndə fenollar 3, mis birləşmələri 4, Bəhramtəpədə isə fenollar 2, mis birləşmələri 4 dəfə YVQH-ni keçmişdir.

Suyun oksigen rejimi bütün məntəqələrdə 5.60-6.10 mq/l arasında olmaqla sanitar norma daxilində dəyişmişdir.

Samirə ƏLİYEVA,
“Xalq qəzeti”