Aprelin 27-də Bakıda TÜRKSOY-un qeyri-maddi mədəni irsin qorunmasına dair III beynəlxalq seminarı işə başlamışdır.
Azərbaycanın Mədəniyyyət və Turizm Nazirliyinin təşkilati dəstəyi ilə Muzey Mərkəzində keçirilən "Türkdilli xalqların qeyri-maddi mədəni irsinin konvensiyalaşdırılması, inventarlaşdırılması və proqramlaşdırılması" mövzusunda seminarın açılışında TÜRKSOY-un məsul işçiləri, Türkiyə, Qazaxıstan və digər ölkələrdən gəlmiş mütəxəssislər iştirak etmişlər.
Tədbir iştirakçılarını salamlayan mədəniyyət və turizm naziri Əbülfəs Qarayev seminarın işinə uğurlar arzulamışdır. Bildirmişdir ki, seminarın ilk günü "Türk dünyasının qeyri-maddi mədəni irsinin qorunması və dəstəklənməsinin konvensiyalaşdırılması perspektivləri" mövzusunda məruzə dinləniləcəkdir.
Günün ikinci yarısında iştirakçıların 2010-cu il üçün Azərbaycanın sənətkarlıq paytaxtı elan olunan Şəkiyə yola düşməsi və aprelin 28-də seminarın işini Şəki şəhərində davam etdirməsi planlaşdırılır.
AzərTAc{nl}