Türkiyənin Kayseri şəhərində Ərciyəz Universitetinin Mədəniyyət Mərkəzində Azərbaycan kinematoqrafçılarının  çəkdiyi "Nar bağı" filmi nümayiş olunub. Tədbirdə ali məktəbin rəhbərliyi, müəllim və tələbələr iştirak ediblər.

Filmin nümayişi Ərciyəz Universitetinin müəllimi Nihal Şengül, eləcə də ali məktəbin azərbaycanlı müəllimləri Nigar Əsgərova və Əsli Əliyevanın təşəbbüsü və təşkilatçılığı ilə baş tutub.

Ekran əsəri tamaşaçılar tərəfindən böyük maraqla izlənilib. Nümayişdən sonra filmin quruluşçu rejissoru İlqar Nəcəflə görüş keçirilib və o, tamaşaçıların suallarını cavablandırıb.

Sonda Ərciyəz Universitetinin rektor müavini, professor Karamehmet Yıldız ali məktəbin adından İ.Nəcəfə təşəkkürnamə təqdim edib.

Qeyd edək ki, "Azərbaycanfilm" kinostudiyası və "Buta Film" kino şirkətinin birgə istehsalı olan "Nar bağı" filmi bir sıra beynəlxalq müsabiqələrdə yüksək mükafatlara layiq görülüb.

M. MÜKƏRRƏMOĞLU,
“Xalq qəzeti”