Azərbaycan şairi və tarixçisi Abbasqulu ağa Bakıxanovun Vətənimizin tarixinə həsr olunmuş "Gülüstani-İrəm" əsəri ilk dəfə ingilis dilində ("The heavenly rose-garden") çap edilib.
A.A. Bakıxanovun farsca yazdığı və Azərbaycan tarixinə aid ən mükəmməl araşdırmalardan sayılan "Gülüstani-İrəm"i ingiliscəyə Villem Flur və Həsən Cavadi tərcümə ediblər. "Gülüstani-İrəm"in ingiliscəyə tərcüməsi artıq dünyada kitab satışı üzrə ən böyük onlayn şəbəkə olan "Amazon"da da satılır.
Qeyd edək ki, kitabın tərcüməçilərindən biri olan Həsən Cavadi əslən Təbrizdəndir. O, ingilis və fars dilləri mütəxəssisidir, Kembric Universitetində ingilis dili üzrə doktorluq dərəcəsi alıb. Tərcüməçilik fəaliyyəti ilə məşğul olan H.Cavadi Mirzə Fətəli Axundovun bəzi əsərlərini də ingilis dilinə çevirib.

Əfsanə BAYRAMQIZI, "Xalq qəzeti"