Azərbaycan Milli Elmlər Akademiyası Folklor İnstitutunun keçirəcəyi "Ortaq Türk keçmişindən ortaq türk gələcəyinə" VI Uluslararası folklor konfransına hazırlıq işləri başa çatmaq üzrədir.
Azərbaycanda folklorun aktual problemləri ilə məşğul olan mütəxəssislərin müntəzəm olaraq görüşlərini və elmi fikir mübadilələrini təmin etmək vacib məsələlərdəndir. Azərbaycandakı folklor tədqiqatlarını dünya standartlarına uyğunlaşdırmaq, elmi inteqrasiyanın miqyasını genişləndirmək, qlobal folklor prosesləri ilə ayaqlaşmaq məqsədilə Azərbaycan Milli Elmlər Akademiyası Folklor İnstitutu müntəzəm şəkil almış beynəlxalq simpoziumlar silsiləsindən növbəti konfransını keçirir.
Builki konfransın Quzey Kıbrıs Türk Cümhüriyyetinin Doğu Akdeniz Universiteti ile birlikdə keçirilməsi qərara alınmışdır.
"Ortaq türk keçmişindən ortaq türk gələcəyinə" VI Uluslararası folklor konfransı 2010 - cu il 25-26 noyabrda Bakı şəhərində keçiriləcəkdir.
Konfransa Türk xalqlarının folkloru və folklorşünaslığın aktual problemlərini araşdıran mütəxəssislər, ümumiyyətlə, Azərbaycan mənəvi mədəniyyətinin müxtəlif sahələri ilə məşğul olan tədqiqatçılar qatıla bilər.

A.ÜLVİ "Xalq qəzeti"