Gənc dirijor Əyyub Quliyev İtaliyada keçirilmiş Arturo Toskanini adına dirijorların IX Beynəlxalq müsabiqəsindən Qran-Pri ilə qayıdıb. Parma şəhərinin məşhur "Paqanini Auditorium" salonunda baş tutan final mərhələsi və konsertdə çıxış edən Keyko Mitsuhani (Yaponiya) 2-ci yerə, Əyyub Quliyev (Azərbaycan) isə 1-ci yerə layiq görülüb.
Əyyub Quliyev, eyni zamanda, Cüzeppe Sinopoli Fondunun təsis etdiyi baş mükafatla da təltif olunub. O bu nailiyyətə çatan ilk azərbaycanlı dirijordur. Gənc dirijorların çıxışlarını dünya şöhrətli dirijor, professor M.Yurovskinin (Almaniya) sədrlik etdiyi münsiflər heyəti - P.Antonini, P.Minardi, L.Ferrari (İtaliya) və M.Ortega Puyol (İspaniya) qiymətləndirib.
Qeyd edək ki, İtaliyanın Parma şəhərində ölkə prezidentinin dəstəyi ilə keçirilmiş müsabiqə üç mərhələdən ibarət olub. Yarışmaya 35 ölkədən 171 dirijor qatılıb. Onlardan yalnız 12 nəfəri 1-ci mərhələyə vəsiqə qazanıb. Müsabiqə Arturo Toskanini Fondu, Jüzeppe Sinopoli Festivalı və Toskanini Filarmonik Orkestrinin təşkilatçılığı ilə baş tutub.

Əfsanə BAYRAMQIZI, "Xalq qəzeti"