Akademik Arif Mehdiyevin əsərlərinin biblioqrafik göstəricisi nəşr olunub. Filologiya elmləri doktoru Aybəniz Əliyeva-Kəngərlinin tərtibçi-müəllifi olduğu biblioqrafik göstərici Azərbaycan Respublikasının  Prezidenti yanında Ali Attestasiya Komissiyasının sədri, Amerika Aeronavtika və Astronavtika İnstitutunun üzvü, akademik Arif Mehdiyevin 1960-2010-cu illərdə Azərbaycan, rus və xarici dillərdə nəşr edilən monoqrafiya, elmi sessiya, simpozium və konfrans materiallarında, dövri mətbuat səhifələrində dərc olunan  məqalələrini əhatə edir.

Azərbaycan Milli Elmlər Akademiyasının Əlyazmalar İnstitutundan AZƏRTAC-a bildiriblər ki, biblioqrafiyaya daxil edilən  materiallar xronoloji qaydada yerləşdirilib.

Nəşrdə akademik A.Mehdiyevin redaktə etdiyi əsərlər, ixtiralar və dissertantlara elmi rəhbərliyini əks etdirən bölmələr də vardır.

Biblioqrafiyada alimin həyatı, elmi-pedaqoji və təşkilatçılıq fəaliyyətindən bəhs edən qısa oçerk, habelə həyatının əsas tarixləri verilib.

Biblioqrafiyadan istifadəni asanlaşdırmaq məqsədilə alimin əsərlərinin, müştərək müəlliflərin və onun haqqında yazan müəlliflərin əlifba göstəriciləri də burada əksini tapıb. Biblioqrafik göstəricisi tədqiqatçılar üçün dəyərli mənbədir.