Dahi bəstəkar, Azərbaycan professional musiqi sənətinin banisi Üzeyir Hacıbəylinin anadan olmasının 125 illiyi ilə əlaqədar Azərbaycan Respublikası Prezidentinin 2010-cu il 23 fevral tarixli sərəncamına əsasən təşkil edilmiş Beynəlxalq musiqi festivalı uğurla davam edir.
Sentyabrın 21-də festival çərçivəsində Müslüm Maqomayev adına Azərbaycan Dövlət Filarmoniyasında Q.Qarayev adına Azərbaycan Dövlət Kamera Orkestrinin konserti keçirilmişdir.
Filarmoniyanın foyesində dahi sənətkar Üzeyir Hacıbəylinin və digər Azərbaycan bəstəkarlarının həyat və yaradıcılıqlarından bəhs edən fotosərgi açılmışdır.
Solistləri Moskva Konservatoriyasının professoru, Beynəlxalq müsabiqələr laureatı Nina Koqan və Toronta şəhəri Kral Konservatoriyasının professoru Atis Bankas olan konsertin dirijoru Azərbaycanın əməkdar incəsənət xadimi İsmayıl Hacıyevdir.
Konsertin proqramına Ü.Hacıbəyli, Q.Qarayev, D.Şostakoviç, İ.Hacıyevin və digər bəstəkarların əsərləri daxil edilmişdir.
Gecədə Azərbaycan Respublikası Prezidenti Administrasiyasının humanitar siyasət məsələləri şöbəsinin müdiri Fatma Abdullazadə iştirak etmişdir.
Kamera Orkestrinin konserti maraqla qarşılanmışdır.
"Üzeyir Hacıbəyli-125" Beynəlxalq musiqi festivalina sentyabrın 28-də yekun vurulacaqdır.
AzərTAc