Kanadanın Toronto və Niaqara şəhərlərində keçirilən Azərbaycan Mədəniyyəti Günləri çərçivəsində məşhur heykəltəraş, akademik Ömər Eldarovun əsərlərinin fotoşəkillərindən ibarət sərgi açılıb. Sərgi Heydər Əliyev Fondu, Beynəlxalq Niaqara musiqi festivalı və Kanada Türk Dostluq Cəmiyyətinin dəstəyi ilə təşkil edilib.
Torontoda "Ümumi sülh naminə mədəniyyətlərin dialoqu" beynəlxalq layihəsi çərçivəsində təşkil edilmiş sərgi böyük maraqla qarşılanıb. Sərgidə türk dünyasının iki böyük lideri - Heydər Əliyevin və Mustafa Kamal Atatürkün, musiqi sənətimizin korifeyləri - Üzeyir Hacıbəyli və Fikrət Əmirovun, mütəfəkkir şairlərimiz Füzuli və Hüseyn Cavidin, rəssam Səttar Bəhlulzadənin heykəllərinin fotoşəkilləri də nümayiş olunub.
Sərgi Heydər Əliyev Fondunun dəstəyi ilə keçirilib. Bu təşəbbüsə minnətdarlıq əlaməti olaraq, sərgidə Azərbaycanın birinci xanımı, Heydər Əliyev Fondunun prezidenti Mehriban Əliyevanın da portreti yer alıb.
Dünyanın bir çox görkəmli şəxsiyyətlərinin obrazlarını öz sənət əsərlərində əks etdirən Ömər Eldarov Toronto Beynəlxalq Mədəniyyətlərarası Dialoq İnstitutunun fəxri üzvü adına layiq görülüb. Qeyd edək ki, Kanadada Azərbaycan Mədəniyyəti Günləri həftənin sonunadək davam edəcək.

Əfsanə BAYRAMQIZI, "Xalq qəzeti"