Bizim orkestr indiyədək dünyanın bir çox ölkələrində konsertlər vermişdir. Azərbaycana isə ilk dəfədir ki, səfər edirik. Ölkənizdə qısa müddətdə olmağımıza rəğmən buranın təbiətini, insanlarını çox sevdik.
Bu sözləri AzərTAc-a Heydər Əliyev Fondunun dəstəyi ilə Qəbələdə keçirilmiş İkinci Beynəlxalq musiqi festivalında müvəffəqiyyətlə çıxış etmiş Böyük Britaniyanın məşhur London Kral Filarmonik Orkestrinin üzvü Deyvid Hoşman demişdir.
Tanınmış musiqiçi əlavə etmişdir ki, biz festivalda iştirak etmək üçün Azərbaycana gələrkən Bakıda təyyarədən endiyimiz andan bu beynəlxalq musiqi bayramının necə yüksək təşkilatçılıqla təşkil edildiyinin şahidi olduq. Hiss etdik ki, Qəbələ festivalının dünya klassik musiqisinin təntənəsinə çevrilməsi üçün əvvəlcədən çox böyük hazırlıq işləri görülmüşdür. Yenidən bu əsrarəngiz diyarda olmaq ümidi ilə Azərbaycandan son dərəcə zəngin təəssüratla ayrılırıq.
AzərTAc{nl}