İstedadlı pianoçu, əməkdar incəsənət xadimi Gülarə Əliyevanın vəfatından 19 il ötür.
Mərhum Gülarə Əliyevanın yaratdığı "Dan ulduzu" instrumental ansamblının üzvləri iyulun 27-də görkəmli pianoçunun məzarını ziyarət etmiş, xatirəsini ehtiramla anmışlar.
Gülarə Əliyeva 1955-ci ildə Azərbaycan Dövlət Konservatoriyasını bitirmişdir. Səid Rüstəmov adına Xalq Çalğı Alətləri Orkestrində, eləcə də Əhsən Dadaşov adına Xalq Çalğı Alətləri Ansamblında çalışmışdır. 1966-cı ildən özünün təşkil etdiyi "Dan ulduzu" instrumental ansamblına rəhbərlik etmişdir.
İstedadlı pianoçu eyniadlı muğamlar əsasında "Şüştər" rapsodiyasının, "Humayun" süitasının, "Bayatı-kürd", "Şur" fantaziyalarının müəllifidir.
Gülarə Əliyeva 1991-ci ildə dünyasını dəyişmişdir. Təsis etdiyi ansambla vəfatından sonra onun adı verilmişdir.{nl}