Heydər Əliyev Fondunun təşkilatçılığı ilə V Qəbələ Beynəlxalq Musiqi Festivalı uğurla davam edir.

Artıq başa çatmaqda olan böyük musiqi bayramı günlərində dünya şöhrətli ifaçıların bir-birindən maraqlı çıxışları yerli sakinlərlə yanaşı, festivalın qonaqlarının da böyük marağına səbəb olur. Dünyanın müxtəlif ölkələrindən musiqisevərlər klassik musiqinin mərkəzinə çevrilən Qəbələyə axışırlar.

Avqustun 5-də festivalın proqramına uyğun olaraq daha bir kamera musiqisi axşamı keçirilmişdir.

Kamera musiqisi axşamında müxtəlif nüfuzlu festivalların iştirakçıları və beynəlxalq müsabiqələr laureatları-tanınmış pianoçular Nina Koqan, Viktoriya Korçinskaya-Koqan, Kseniya Başmet, habelə skripkaçı Daniel Milkis çıxış etmişlər.

Konsertdə klassik Avropa bəstəkarları Klod Debüssinin, Frans Pulenkin fortepiano üçün sonataları, eləcə də Frans Şubertin “Arpeggione” əsərindən parçalar təqdim edilmişdir.

Kamera musiqisi axşamında “Yeni Rusiya” Dövlət Simfonik Orkestrinin bədii rəhbəri və baş dirijoru, “Moskva solistləri” kamera ansamblının qurucusu, “Qremmi” mükafatının sahibi Yuri Başmetin skripkada ifası tamaşaçılara unudulmaz anlar bəxş etmişdir.