Bakıda artıq üçüncü dəfədir ki, keçirilən “Muğam aləmi” Beynəlxalq Muğam Festivalının dünyada əhəmiyyəti əvəzolunmazdır.

Bu sözləri Heydər Əliyev Fondunun, Mədəniyyət və Turizm Nazirliyinin və Azərbaycan Bəstəkarlar İttifaqının birgə təşkilatçılığı ilə ölkəmizdə keçirilən “Muğam aləmi” Üçüncü Beynəlxalq Muğam Festivalında iştirak edən Çinin Sincan-Uyğur Muxtar Rayonunun “Beautiful girls” musiqi kollektivinin rəhbəri Davud Mamut demişdir.

Bakıya ilk dəfə gəldiyini deyən qonaq şəhərin gözəlliyindən, xüsusilə paytaxtımızın gecələrinin möhtəşəmliyindən söz açmışdır:

“Buranın iqlimi də gözəldir. Bakının qədim və müasir tikililəri diqqəti xüsusilə cəlb edir. Sakinlərin qonaqpərvərliyini, qayğıkeşliyini isə unutmaq mümkün deyildir”.

Ölkəmizin dinamik inkişaf etdiyini vurğulayan qonaq ötən gecə Bakını gəzdiyini qeyd edərək demişdir: “Gəzməli yerləriniz, fəvvarələriniz hər kəsdə yaxşı təəssürat yaradır. Burada hər şey səliqəlidir. Azərbaycanlılar çox mehriban və qonaqpərvərdirlər”.

D.Mamut Azərbaycan haqqında ən gözəl təəssüratlarını öz həmvətənləri ilə məmnuniyyətlə bölüşəcəyini bildirmişdir.

AzərTAc