Ağdamın Mirəşelli kəndi yaxınlığında aparılan qazıntılar zamanı nadir arxeoloji nümunələr tapılmışdır.
Azərbaycan Milli Elmlər Akademiyası (AMEA) Arxeologiya və Etnoqrafiya İnstitutunun aparıcı elmi işçisi, tarix üzrə fəlsəfə doktoru, professor Hidayət Cəfərov APA-nın Qarabağ bürosuna bildirib ki, aşkarlanan nümunələr eramızdan əvvəl 12-11-ci əsrlərə aiddir və çox nadir tapıntılar hesab olunur: "Arxeoloji qazıntı zamanı aşkarlanan küplərin nekropol nümunəsi - yəni qədim insanlara məxsus qəbir yeri olduğu müəyyən edilib. İndiyədək bu cür qəbir yerlərinə çox az rast gəlinirdi. Bu cür arxeoloji tapıntılar palıdlı nekropol adlanır. Bu nümunələr xüsusiyyətlərinə görə çox qədim dövrlərə aid kifayət qədər məlumatlar əldə etməyə imkan verir".
Professorun sözlərinə görə, qazıntılar nəticəsində aşkarlanan kuzələr, keramika nümunələri də nadir hesab oluna bilər: "Bununla yanaşı, bu nadir qəbir nümunələri qədim tayfaların adət-ənənələrinin öyrənilməsinə də imkan yaradır. Bu nekropol nümunələri tariximizin öyrənilməsi baxımından çox böyük əhəmiyyətə malikdir. Bu səbəbdən də ərazinin arxeoloji tədqiqatı AMEA-nın diqqətdədir".
Qeyd edək ki, qazıntı işləri aparılan ərazi bir neçə il əvvəl yerli sakinlər tərəfindən aşkarl olunmuşdur.