Rusiya Federasiyası Kinematoqrafçılar İttifaqının sədri Nikita Mixalkov Azərbaycan Kinematoqrafçılar İttifaqının yaradılması ilə əlaqədar bu quruma təbrik məktubu göndərmişdir.
Yeni yaradılan Kinematoqrafçılar İttifaqından APA-ya verilən məlumata görə, təbrik məktubunda deyilir: "Sizi Azərbaycan Respublikası Kinematoqrafçılar İttifaqının yaradılması və sədr seçiminiz münasibətilə təbrik edirəm. Son 20 il müddətində Azərbaycan və Rusiya kinematoqrafçılar ittifaqları arasında bütün münasibətlər qırılmışdı, amma bu, bizim günahımızdan deyil. Sizin kino xadimlərinizlə şəxsi münasibətlərdə əlaqələr davam edirdi".
N. Mixalkov bu münasibətlərin bərpa olunmasına ümid etdiyini bildirərək, bu münasibətlə yeni qurumun rəhbərliyini Moskvaya dəvət etmişdir.
Qeyd edək ki, ötən həftə Azərbaycanda yeni Kinematoqrafçılar İttifaqı təsis olunmuşdur. Xalq artisti Şəfiqə Məmmədova bu qurumun sədri, Cəmil Quliyev isə icraçı katibi seçilmişdir.