A.S.Puşkinin anadan olmasının 213-cü ildönümü ilə əlaqədar Səbail Rayon İcra Hakimiyyəti, Rusiya Federasiyasının ölkəmizdəki səfirliyi və "Sodrujestvo" cəmiyyətinin böyük rus şairinin Bakıdakı abidəsi önündə keçirdiyi mərasimdə ədibin həyat və yaradıcılığından, öz əsərləri ilə dünya ədəbiyyatında əbədi iz qoymasından söhbət açıldı. 
Anım mərasimində A.S.Puşkinin ümummilli lider Heydər Əliyevin iştirakı ilə 2001-ci ildə açılmış heykəli önunə tədbir iştirakçıları adından gül dəstələri və tər çiçəklər qoyuldu.
Azərbaycanda fəaliyyət göstərən müxtəlif xalqların mədəni mərkəzlərinin, ali və orta məktəblərin nümayəndələrinin, tanınmış mədəniyyət və incəsənət xadimlərinin iştirakı ilə keçirilən ənənəvi poeziya gününü giriş sözü ilə açan şairə Oksana Bulanova Azərbaycan və Rusiya xalqları arasında dostluq və mədəni əlaqələrin gücləndirilməsində belə tədbirlərin böyük rolu olduğunu vurğuladı.
Rusiya Federasiyasının Azərbaycandakı səfiri Vladimir Doroxin, Səbail Rayon İcra Hakimiyyəti başçısının birinci müavini Xalidə Bayramova, "Sodrujestvo" cəmiyyətinin sədri Tatyana Kərimova və başqaları rus ədəbiyyatının formalaşması və inkişafında misilsiz xidmətləri olmuş A.S.Puşkinin dünya ədəbiyyatı xəzinəsini də zənginləşdirdiyini söylədilər. Qeyd olundu ki, onun çoxsaylı poemaları, şeirləri, povest və hekayələri bir çox xalqların dillərinə tərcümə olunmuş, yaradıcılığında rus xalqının arzuları, zəkası və yaradıcılıq qüdrəti öz parlaq ifadəsini tapmışdır. Puşkinin əsərləri görkəmli Azərbaycan şair və yazıçılarından Məmməd Səid Ordubadi, Məmməd Rahim, Mikayıl Müşviq, Nigar Rəfibəyli, Süleyman Rüstəm, Səməd Vurğun və başqaları tərəfindən tərcümə olunmuşdur. Rus şairinin Azərbaycanda sevilməsində bu tərcümələrin böyük rolu olmuşdur.
Tədbirdə Səbail rayon orta məktəblərinin şagirdlərinin, tanınmış mədəniyyət xadimləri və şairlərin, Azərbaycandakı rus icmasının nümayəndələrinin ifasında ölməz şairin şeirləri Azərbaycan və rus dillərində səsləndi.

R.TAHİR, "Xalq qəzeti"