Bu ilin may ayında Bakıda "Eurovision-2012" Beynəlxalq Mahnı Müsabiqəsinin keçirilməsi üçün dövlət büdcəsindən 50 milyon manat (63,3 milyon ABŞ dolları) ayrılacaq.
"APA-ECONOMICS"in məlumatına görə, Nazirlər Kabinetinin sərəncamı ilə Azərbaycanda "Beynəlxalq və respublika səviyyəli tədbirlərin keçirilməsi ilə bağlı xərclər üzrə 2012-ci ilin dövlət büdcəsində nəzərdə tutulmuş vəsaitin bölgüsü" təsdiqlənmişdir.
Sərəncama əsasən, 2012-ci ildə bu məqsədlərlə dövlət büdcəsində 77 milyon manat nəzərdə tutulmuşdur. Bu vəsaitin 50 milyon manatı "Eurovision-2012" Beynəlxalq Mahnı Müsabiqəsinin keçirilməsi ilə bağlı xərclərin maliyyələşdirilməsinə sərf ediləcək. Qalan 27 milyon manat isə digər tədbirlərin keçirilməsinə xərclənəcək.
Sərəncama əsasən, beynəlxalq və respublika səviyyəli tədbirlərin keçirilməsi üçün Mədəniyyət və Turizm Nazirliyinə 5,4 milyon manat, Diaspor üzrə Dövlət Komitəsinə 3,8 milyon manat, İqtisadi İnkişaf Nazirliyinə 2,9 milyon manat, Xarici İşlər Nazirliyinə 2,6 milyon manat, Milli Məclisə 828 min manat ayrılacaq.