Dekabrın 5-də Kanadanın Vankuver şəhərində, bu ölkədə ilk dəfə Azərbaycan mədəniyyət və icma mərkəzi fəaliyyətə başlamışdır. Azərbaycan mədəniyyət və icma mərkəzində Azərbaycan dilinin, musiqisinin və milli rəqslərinin tədrisi kurslarının təşkili planlaşdırılır.
Bu barədə Milli.az saytı məlumat yayıb. Mərkəzin açılışında Vankuverdə yaşayan Azərbaycan icmasının fəal üzvü Məhəmməd Purazadın xüsusi rolu olmuşdur. Azərbaycan mərkəzinin binası M.Purazad tərəfindən əsaslı təmir edilmişdir.
Bu münasibətlə təntənəli açılış mərasimi keçirilmişdir. Mərasimdə iştirak edən Azərbaycanın Kanadadakı səfiri Azərbaycan mədəniyyətinin Kanadada təbliğinin və Azərbaycan icmasının bu ölkədə mütəşəkkil fəaliyyət göstərməsinin vacibliyini qeyd etmişdir.
Tədbir Azərbaycan musiqisindən ibarət konsert proqramı ilə sona yetmişdir.

M.MÜKƏRRƏMOĞLU, "Xalq qəzeti"